Teikningar av historiske bygningar

Riksantikvaren og Fortidsminneforeningen sit på eit stort biletmateriale av oppmålingsteikningar og originale arkitektteikningar av historiske bygg frå 1820–2007. Tekniske teikningar av liten historisk interesse, tenkjer du kanskje. Men meir feil kan du ikkje ta. Her er vakre akvarellar utførte av kjende arkitektar som Peter Blix, Heinrich Ernst Schirmer, Iohan Meyer og Henrik Bull. Dette arkivet vart i 2014 teke opp i den norske delen av UNESCOs Memory of the Word-register. No er eit utval av teikningane lagde ut på nettet, på Riksantikvarens opne biletregister.

Tre Bremnes på ein gong

Syskentrioen Kari, Lars og Ola Bremnes gav ut albumet Soløye i 2000 og fekk Spellemannprisen same året. Dei siste 17 åra har dei tre gitt ut album på kvar sine kantar i ulike kunstnarlege retningar. Kari Bremnes har dessutan gjort det stort i Tyskland.

På Festspela i Nord-Noreg neste sommar blir dei tre foreina på nytt. Då skal dei komponere bestillingsverket Eternitt. Produksjonen blir såleis den første dei gjer saman på 18 år, når festspela går i gang i juni. Ifølge heimesida til festspela skal dei tre synge om gåter, måneskin, nordavind og mannskit. Konserten kjem til å innehalde både nye og velkjende låtar.

Slår eit slag for kontrabassen

Norsk Kontrabassklubb vart stifta hausten 2017 for å auke interessa rundt det klassiske instrumentet. For sjølv om kontrabassen har vore i bruk sidan 1600-talet, og er ein basis i orkesteret, er det mange kulturskular og orkester som rett og slett framfører musikk utan. Årsaka er at interessa for instrumentet er laber. Norsk Kontrabassklubb skal difor byggje nettverk, gi elevar sjansen til å møte lærarar på høgt nivå og vere ein møtestad der kontrabasslærarar kan utveksle erfaringar og etablere samarbeidsprosjekt, skriv fagbladet Musikkultur.

#MeToo og Svenska Akademien

#MeToo-kampanjen har sveipa som ein stormkast gjennom svensk kultur. Det har gått hardast ut over kulturprofilen Jean-Claude Arnault, den franske teaterinstruktøren som er gift med diktaren Katarina Frostenson, medlem av Svenska Akademien. Skuldingar mot Arnault handlar ikkje berre om seksuell trakassering, han skal òg ha leke informasjon om nobelprisvinnarar i litteratur før offentleggjeringa. No har Arnault og Frostenson rømt frå Sverige. «Vad tror ni om mig? Varför skulle jag göra så för? Det låter ju helt sinnesrubbat!», er Arnaults kommentar til det heile, ifylgje Stig Larsson.

Ungdomsroman på samisk

Saia Stueng, ein ung nordsamisk forfattardebutant frå Karasjok, er aktuell med ungdomsromanen Hamburgerprinseassa. Romanen handlar om Maren som er 17 år, og som bur med mor si i ein kommunal bustad. Maren prøver å halde ut skulekvardagen, ho slit med mobbing og eteforstyrring. Boka har fått merksemd for eit modig språk. Til NRK Sapmi fortel Stueng at ho ville skildre det vågale ungdomsspråket som er utbreitt i samisk.

Elise Løvereide