Verdspremiere på stumframsyning

Fredag 29. mars er det premiere på stumteaterframsyninga The Mute, framført av Stavanger Symfoniorkester og Janove Ottesen i Stavanger Konserthus. The Mute er ei historie fortalt utan replikkar og ord, men med levande musikk og animasjon. Ottesen har komponert det symfoniske verket, medan skodespelar og manusforfattar Christian Eriksen står for manus og spelar den mannlege hovudrolla i stykket. Musikken er arrangert av Gisle Kverndokk.

Stumframsyninga har alt gjeve salsrekord for Stavanger Symfoniorkester, ifølgje Stavanger Aftenblad.

Premieren vart utseld like etter at stykket vart lansert. The Mute skal spelast i alt sju gonger frå 29. mars til 6. april.

Ny forlagssjef i Aschehoug

Nora Campbell er tilsett som forlagssjef i Aschehoug Skjønnlitteratur og startar i stillinga i august.

Campbell er i dag redaktør for norsk skjønnlitteratur i same forlag og har vore redaktør for mellom anna Jo Nesbø og Maja Lunde.

– Nora er utan tvil eit av dei største forleggjartalenta vi har i Noreg, seier Mads Nygaard, forleggjar og konsernsjef i Aschehoug ifølgje nettsida Bok365.

Campbell er utdanna ved Universitetet i Oslo og har ein mastergrad i litteraturformidling.

Ytringsfridomspris til Ali

Den norsk-somaliske forfattaren og spaltisten Sumaya Jirde Ali er tildelt Ytringsfridomsprisen for 2018 av Den norske Forfatterforening. Ali skriv for Morgenbladet og Klassekampen og har gjeve ut dei to skjønnlitterære bøkene Kvinner som hater menn (2017) og Melanin hvitere enn blekemiddel (2018).

Ali vart fødd i Somalia i 1997 og kom til Noreg i 2005. Ho har dei siste åra vorte utsett for mykje netthets i samband med deltakinga si i samfunnsdebatten. Forfattarforeininga grunngjev prisen med at ho syner mot og styrke nok til å ikkje gje seg, og at ho nektar å kapitulere for dumskapen og råskapen. Ytringsfridomsprisen vart oppretta i 1993 og skal gå til ein norsk eller utanlandsk forfattar som har utmerkt seg i arbeidet for ytringsfridom og toleranse.

Mercury-film sensurert i Kina

Den kinesiske versjonen av den Oscar-vinnande filmen Bohemian Rapsody er utsett for sensur, melder CNN. Delen av filmen der Queen-songaren Freddie Mercury fortel kona at han likar menn, er fjerna frå filmen, det same gjeld bruken av ordet gay og ei scene der to menn kyssar. Til saman er to minutt av handlinga fjerna for det kinesiske publikummet, som følgje av at Kina i 2016 forbaud skildringar av «unormal seksuell oppførsel», inkludert homofile og lesbiske forhold i TV- og online-program.

eva@dagogtid.no