Denne sommaren har stått i dritungens teikn, ifølgje populærkulturen. Det surt eplegrøne coveret på albumet brat av Charli XCX har fargelagt internett og dansegolv i så stor grad at sjølv vi som er fans, begynner å bli flaue. Tekstene på albumet er drøftande og skarpe, dei eksponerer artistens store og smålege bekymringar, og kanskje er det derifrå tittelen «dritunge» kjem.

Når eg plukkar av smussomslaget på Mira Hussains debutbok, Hjertet er ei rabiat bikkje, som kom i mars i år, finn eg same brat-grøne fargen. Og stemma i desse dikta har absolutt noko trassig ved seg, noko kvardagsleg og kvardagsspråkleg. Men like sterkt til stades er store tema om tilhøyrsle, familie og identitet – og eit meir dramatisk og høgpoetisk språk. Det skapar eit fascinerande spenn i fleire av dikta.

Forholdet til mora og til Gud er sentralt i boka, slik vi ser i diktet «Fremmede haver». Tankar rundt synd og dommedag blir drøfta ofte. I dette diktet svarar rett nok «jeg» nokså nonchalant på mora sin trugsel om «dommens dag»; ho et fleire eple. Eller «jeg tar dem til munnen» – ei litt gamaldags formulering som framhevar rørsla og provokasjonen.

Denne måten å flette det høgtidelege språket inn i det ungdommelege livet på gjer meg begeistra. «jeg velter ved hennes føtter og hennes slør/ slik skyene velter»! Stemma har noko dramatisk over seg. Men poeten utbroderer ikkje for mykje, er også korthogd og konkret: mora i dørsprekken, både knipen og kravstor. Den språklege vekslinga til Hussain speglar det emosjonelle spennet i dikta på stødig vis.

Anna Kleiva

Fremmede haver

mor er et skall av en kvinne
som venter på at hennes trær skal bære verdige frukter
jeg ble et fikentre det begynte å falle epler fra
jeg tror Gud frykter sin skapelse
slik min mor frykter meg

det er dommens dag, sier mor
jeg plukker epler i fremmede haver
jeg tar dem til munnen

jeg velter ved hennes føtter og hennes slør
slik skyene velter hengivent over himmelen
hun skyter meg blikk ut av sprekken på en dør
hennes fravær spiser meg levende
hun forblir sulten

Mira Hussain