Den russiske sjakkspelaren Vladimir Lepjosjkin var på mitt nivå og ikkje noko å skriva i avisa om. Då var det annleis med estlendaren Paul Keres, ofte rekna som den beste spelaren som aldri vart verdsmeister. Ein gong møttest dei to i sovjetmeisterskapen.

Ein hovudristande tilskodar sprang ut av lokalet: «No har eg sett det òg! Lepjoskin sette Keres i sjakk!» Eg reknar med at Keres vann partiet – ein døyr jo ikkje av ein sjakk – men historia høyrer heime i den klassiske sovjetiske sjakkfolkloren. I romjola fekk ho avløysing då stormeister Emil Sutovskij kom opp med ein ny parafrase:

«No har eg sett det òg! Inarkiev sette Carlsen i sjakk!» Det var den mest absurde sjakkscena som er vist på norsk TV. I fyrste runde av verdsmeisterskapen i lynsjakk gjekk favoritten Magnus Carlsen mot ein klår siger mot russaren Ernesto Inarkiev. Carlsen sette motstandaren i sjakk, men Inarkiev svara ikkje med å flytta kongen. I staden sette han Carlsen i sjakk med springaren. Det var eit ulovleg trekk frå russaren, men verdsmeisteren vart så perpleks at han automatisk flytta kongen sin ut av sjakken.

Det var då Inarkiev noko overraskande kravde siger. Domaren måpte. «Kan de ikkje vera vener og ta remis?», foreslo han. «Nei, Carlsen har tapt av di han ikkje påpeikte at eg spela eit ulovleg trekk», sa Inarkiev. «Ja vel, då seier vi det», sa domaren. Verdsmeisteren visste ikkje kva han skulle meina, men gav seinare klår melding til hovuddomaren om at partidomaren, som openbert ikkje kunne reglane, burde finna seg noko anna å gjera.

Det er uvanleg, men ikkje ulovleg ikkje å krevja siger på ulovleg trekk. Carlsen gjorde ikkje noko gale, og det skjøna etter kvart hovuddomaren, som gjorde om vedtaket til partidomaren. NRK-gjesten Kristopher Schau karakteriserte den ulovlege sjakken og konfliktane for open scene som det sjukaste han nokon gong hadde sett. «No har Schau sett det òg! Inarkiev sette Carlsen i sjakk»

ATLE GRØNN

Atle Grønn er internasjonal
meister i sjakk.