I dataprogrammet Turnerings-
service, laga av sjakkentusiasten Harald Heggelund, kan ein fylgja resultat over tid. Vi skal fylgja Sven i miniputtklassen i landsturneringa på Gausdal i 1999.

I fyrste runde tapte Sven mot Stefan Randeljovic frå Nordstrand. Stefan gav seg med turnerings­sjakk i 2004. I andre runde slo Sven ein spelar frå Kragerø, Bendik Svendsen, som gav seg i 2005. I tredje runde spela Sven remis mot Thomas Lie frå Porsgrunn. Eg finn ikkje fleire spor av Thomas i norsk sjakk. I fjerde runde tapte Sven mot Audun Brekke Fløtten frå Modum. Audun har ikkje fleire resultat i Turneringsservice. Han er i dag profesjonell syklist, og i sjakken mest kjend som ein av fem sjakksysken med sjakkfar Øystein Brekke. «Mr. Norsk Sjakk» skriv bøker og sel alt i sjakk gjennom Sjakkbutikken i Drammen.

I femte runde vann Sven mot Daniel Thomassen frå Alta. Daniel har ikkje fullført ei turnering sidan 1999, men synte seg i miljøet éin gong i 2007. I sjette runde vann Sven mot Christian Elboth frå Nittedal. Han gav seg etter 1999, men byrja spela på nytt i 2013, då Carlsen vart verdsmeister. I sjuande runde tapte Sven mot Tobias Kolbu frå Oslo som ikkje har registrert fleire turneringar. I åttande runde vann guten mot Eldbjørg Blikra Vea frå ein stor sjakkfamilie i Stavanger. Ho gjorde comeback i NM på heimebane i 2017. I niande runde spela Sven remis mot Arne Selle frå Hauge. Arne gav seg i 2003. Deretter slo han Håkon Øksnevad frå Nittedal, son av eldsjela Arild Øksnevad som har drive sjakkundervisning i 40 år. Håkon spela sitt siste NM i 2004.

I siste runde tapte Sven mot sterke Håvard Vederhus frå SK 1911 i Oslo. Vederhus kom på 4. plass i miniputt. Han vart leiar i Oslo AUF og døydde på Utøya i 2011.

Guten, åtte år gamal, ført opp som «Sven M. Øen Carlsen», enda slik med 6 av 11 poeng på 13. plass i miniputt. Sven har ikkje registrert fleire turneringar i Turneringsservice, men han har vore særs aktiv og god, betre kjend med siste del av fornamnet og siste del av etternamnet. M. Carlsen vann miniputtklassen året etter, og reknar denne sigeren for eit absolutt høgdepunkt i karrieren.

Atle Grønn

Atle Grønn er internasjonal
meister i sjakk.