Nihon Hidankyo får Nobels fredspris i år «for innsatsen sin for ei atomvåpenfri verd og for å visa gjennom vitnemål at atomvåpen aldri må brukast igjen». Organisasjonen, som vart skipa i 1956, arbeider for å avskaffa atomvåpen og for velferda til overlevande etter atombombene i Hiroshima og Nagasaki.

Fredsprisen til Nihon Hidankyo var ei klok avgjerd. Ein kan innvenda at det berre er sju år sidan sist, i 2017, at ein organisasjon mot atomvåpen fekk fredsprisen, Den internasjonale kampanjen mot atomvåpen. Men det er nok av gode grunnar som talar for tildelinga i år.

Kampen mot atomvåpen er alltid eit viktig tema. Men akutt no er det å gje tydelege tilbakemeldingar til Russland og president Putin om at det er uansvarleg å truga med atomvåpen, slik Putin har gjort ved fleire høve etter storskalainvasjonen av Ukraina i 2022.

Desse stadige trugsmåla har vore nok eit døme på Putins og Russlands uansvarlege og brutale framferd i denne krigen. Russland har til og med plassert ut atomvåpen i Belarus etter invasjonen i 2022.

I tillegg er det viktig i desse dagar å minna Iran om at dei aldri må utvikla atomvåpen, og ein må få på plass ein avtale med Iran som sikrar det.

Her heime bør Støre-regjeringa ta årets fredspris som ei oppmoding om å gje norske friviljuge organisasjonar som arbeider for nedrusting og ikkje-spreiing av atomvåpen, ei fast anstendig statleg støtte. I statsbudsjettet for 2025 ligg det no inne berre fem millionar til desse organisasjonane. Det er ei halvering av støtta frå i fjor.

Ei regjering som i FNs generalforsamling lovar å vera pådrivar for nedrusting, driv ikkje med slike smålege kutt i ei så viktig sak. Alle land treng friviljuge organisasjonar som informerer om dei katastrofale fylgjene av atomvåpenbruk.

Svein Gjerdåker