DRAMA

Regi: Robert Guédiguian

Huset ved sjøen (Orig. tittel: La villa)

Med: Ariane Ascaride, Jean-Pierre Darroussin, Anais Demoustier

Då faren blir lamma av slag, samlar søskena Angèle (Ascaride), Joseph (Darroussin) og Armand seg i huset hans i ei pittoresk vik utanfor Marseille. Mimring i familien skapar kranglar og kos. Angèle har halde stor avstand, Armand har hjelpt faren. Joseph stiller med ung dame, depresjon og dårlege vitsar. Huset ved sjøen er ei familiehistorie som symboliserer franske tidsskilje og sakn av svunne stunder.

Franske fjes

Den røynde gjengen med skodespelarar gjer alle godt arbeid, men eg forstår godt at det var unge Anais Demoustier som blei nominert til den nasjonale prisen César for beste birolle. Ho har ein enigmatisk sjarm. Ariane Ascaride er så god at ho fortener sin vante plass sentralt i filmane til ektemannen Guédiguian. Jean-Pierre Darroussin er òg ein gammal kjenning som kan faget.

Førre filmen til Guédiguian, Don’t Tell Me the Boy Was Mad, tok for seg eit ukjend tema for dei fleste nordmenn, nemleg armensk terror for å få merksemd rundt folkemordet. Slik gav han ei historisk ramme til eit tidsriktig tema i Frankrike, som framleis er plaga av terror.

Nostalgi på ny

Tematikken i den nye filmen er kjent. Familieforhold og tradisjonelle franske filmtema står i sentrum. Klassesamfunnet er på plass her som i Snøen på Kilimanjaro og Byen er stille av same mann. Kva kultur og samfunn ein har arva, kjem òg opp. Litterære referansar sit laust. Skodespelar Angèle siterer dramaturgane Paul Claudel og Bertolt Brecht. Guédiguian står støtt på venstresida. Som vanleg held han til rundt heimlege Marseille. Tilbakeblikk og lydklipp frå skjønne sommarstunder og tragediar bidreg til at vi forstår familiehistoria.

Militarisering og migrasjon gjev nye dimensjonar til debatt. Stundom kjennest kjeklinga gjengrodd, men kanskje kan det hjelpe å reinske gamalt kratt for å opne stiar og få ein frisk start. Huset ved sjøen er ikkje noko meisterverk, men regissør Robert Guédiguian er ein stabil leverandør av solid drama. Om du plar like dei franske dramaa på kino her til lands, kan du godt ta turen no òg.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.