Periodedrama

Regi: John Alexander

Belgravia

Med: Tamsin Greig, Philip
Glenister, Harriet Walter, Jack Bardoe
NRK

Vi er i London i fyrste halvdel av attenhundretalet. Herr og fru Trenchard (Glenister og Greig) lever på halvnåde i aristokratiske krinsar, som den nyrike forretningsmannen han er.

Dotter deira og son til hertugparet Brockenhurst dannar upassande band, og dermed har du det gåande, med herskap, tenarar og alt som høyrer med.

Tynn

Eit par artige vriar gjer at Belgravia kunne fungert som meir enn berre eit kostymedrama: det at ein får innblikk i korleis det er ikkje å vera fødd inn i velstanden, og korleis sosieteten då tek imot ein, og at godt vaksne damer dominerer skjermen framfor unge, yndige debutantar.

Utover dette slit eg med å finna dei positive vinklingane. Visst er det påkosta, og visst er det pent. Det er trass alt skaparane bak Downton Abbey som får svinga fjørpennen igjen, og då skortar det ikkje på budsjett. Likevel er ideen bak så tynn som musselin. Det blir heller ikkje tid til å få særleg anna enn overflatisk kjennskap til hovudpersonane, inkludert den obligatoriske tenaravdelinga i kjellaren. Kva er då vitsen?

Gjesp

Julian Fellowes har skrive manus til ei rekkje herskapelege drama for TV, frå Little Lord Fauntleroy (1995) og Gosford Park (2001) til (ja, du gissa det) Downton Abbey (2010–2015). Dette skal han kunna. Så korleis endar han opp med eit så stivt, uoriginalt og – minst tilgjeveleg av alt ­– kjedeleg drama som dette?

Etter fyrste episode lurar eg ikkje eingong ørlite på kva som kjem til å skje gjennom dei seks episodane dei har drege ut denne dårlege husmorromanen i. All verdas rake ryggar i korsett og kniplingar kan ikkje redda eit dårleg manus. Det er jo elegant til fingerspissane, men eg fryktar det ikkje held, sjølv for dei største tilhengarane.

Eg er ikkje blant dei, men det store unntaket som stadfesta regelen for meg, var den strålande BBC-filmatiseringa av Jane Austens Stolthet og fordom (1995).

Belgravia er ikkje noko å vera stolt av for Fellowes’ del, og eg vil påstå at fordommane mine mot kostymedrama diverre vert innfridde.

Brit Aksnes

Brit Aksnes er frilans kultur­arbeidar og fast filmmeldar i Dag og Tid.