Besto sin kling

Av tidl. kokkelærling på Mæland Hotel i Granvin, Ivar Nimme

Ja, ho kunne koka,

Ja, ho kunne steika,

Bryggja og baka,

Bollar og brød,

Elta og kna,

Sylta og svi

Men no er ho borte,

Kjevla lagt vekk

Men oppskrift

på klingen

er rissa i blekk

den held eg høgt

blant mine kjæraste ting,

det hender eg byr fram

Besto sin kling.

Språkspalta me ikkje har

Eigentleg har ikkje denne utgåva av Innsida teke på seg noka språkspalte. Inntrykket er at det er så mange språkspalter. Likevel kunne Innsida ikkje dy seg for å ta fram ei overskrift frå den digitale utgåva av VG.

I dei knappe digitale media lyt ein òg få fram kva som hender nokolunde forståeleg. Denne mannen som tydelegvis brekte og bar seg i eit skianlegg, var det diverre ikkje bilete av. Kan det ha vore ein sau?

PS. Ikkje send inn noko til denne språkspalta. Ho finst eigentleg ikkje. Send inn skilt og bilete av norske matskattar eller gauper.

Skilt med haldning

Innsida har vore på ei skjenkjestove i den svenske hovudstaden. I garderoben hadde dei hengt opp eit skilt som var svært tydeleg på at kven som helst var velkomne til å arbeida her. Eit annleis skilt enn det ein er van med på restaurant, men absolutt noko me oppmodar andre til å gjera. Kanskje me kunne finna noko slikt på ferjo:

«Her på ferja jobbar sogningar, hardingar, bergensarar, ein albanar og ein og annan gravensar. Det går sånn nokolunde.»