Biletbok

Henrik Hovland og Torill Kove (ill.):

Johannes Jensen tar nattoget

Vigmostad & Bjørke

Johannes Jensen er ein etablert figur i den norske barnebokhylla. I den fjerde forteljinga om likningsfunksjonæren i krokodilleham er temaet frykt. Johannes Jensen skal ta nattoget til Bergen. Han gruar seg. Mykje kan gå gale.

«– En gang i livet må vi alle reise til Bergen. Det kan virke skummelt, men er ikke farlig», forklarer kona Frida.

I slike replikkar vinkar boka til den vaksne høgtlesaren. Sjølv om hovudlina i historia er lagd i augehøgd med barnet som lyttar, verkar det som om både forfattar og illustratør ynskjer å motivere og løne høgtlesinga. Små gleder du treng vaksne auge for å sjå, er strødde utover, både i tekst og i bilete.

Reisa til Bergen er ei øving i å ta styring over tankane og utfordre seg sjølv, eitt steg om gongen. Fleire tekstbolkar er av det filosofiske slaget. Barnet treng ein medlesar som kan klargjere, tilpasse og knyte erfaringane i boka til erfaringane i livet, slik det artar seg for den som er liten. Påminninga om å velje eit positivt perspektiv er endå ein bonus for den vaksne som les.

Samsvaret mellom uttrykket i illustrasjonane og den språklege stiltonen i teksten er ein styrke i alle dei fire bøkene om Johannes Jensen. Fyrsteinntrykket er presist, stramt, ryddig og korrekt. Desto større effekt har alle absurditetane. Etter kvart opnar lesaropplevinga for ein kombinasjonen av melankoli og komikk som loddar djupt og minner om at det å lese kan vere ei trening i å leve.

Janne Karin Støylen

Janne Karin Støylen er bonde og litteraturvitar.