Illustrert
barnebok

Vilde Kamfjord, Rune Markhus (ill.):

På omveien hjem

Gyldendal

Vilde Kamfjord debuterer med ei original og rørande skildring av eit tilfeldig møte mellom ei lita jente og ei godt vaksen kvinne på toget. Både Vinde og Britt skal til Lillehammer. Kvar historia vil ta vegen, er umuleg å gjette seg til, anna enn at det tidleg vert tydeleg at Vinde har mykje på hjartet og at ho treng nokon å snakke med.

Vinde fortel at ho er på veg i fødselsdag for å spele blokkfløyte, saman med mor si og venen sin, Ronald. Ronald er ein superhelt for Vinde. Dette får Britt til å fortelje om Fredrik, som ho forelska seg i i sjette klasse og endeleg snart skal gifte seg med.

Boka er både skriven og formgitt som ein samtale. Om det vert stille mellom dei to togpassasjerane, flyg ein fugl mellom linjene. Tolka som eit symbol, gjev fuglen mellom linjene bodskapen vengjer.

Vinde er direkte og insisterande. Legg ho vekt på eit ord, er det utheva i kursiv. I dedikasjonen takkar forfattaren klasse 4b på Flisnes skole, og etter kvart høyrer vi stemma til ei jente i fjerdeklassealder stadig klarare. Lesinga er som ei langsam framkalling av eit portrett av fjerdeklassingen i bunad og cherroxstøvlar.

Illustrasjonane til Rune Markhus utdjupar nokre av hendingane Vinde fortel om, av og til i heile oppslag, av og til i detaljar langsetter ei side. Scenene forsterkar stemninga i samtalen som først er vittig og finurleg, deretter meir melankolsk og til slutt prega av eit poetisk alvor.

For nokre år tilbake lanserte Unicef kampanjen «Den Ene». Barn og unge treng vaksne som ser dei. Ver den eine som bryr seg, oppmodar Unicef. Britt blir den eine for Vinde.

Janne Karin Støylen

Janne Karin Støylen er bonde og litteraturvitar.