Illustrert barnebok

Thore Hansen:

Neshornets hemmelighet

Gyldendal

I ein mannsalder og meir har barnebokkunstnaren Thore Hansen teikna og dikta om verda bortanfor vår eiga, der fantasien og fablane rår. Mange lesarar kjenner han gjennom fantasyserien Skogland. Endå fleire hugsar han for samarbeidet med Tor Åge Bringsværd om sjøormen Ruffen.

I Neshornets hemmelighet møter vi Emilie. Ho har 13 frekner på nasen og seier at ho er 14 år, sjølv om det ikkje er sant. Emilie er «et fantasifullt barn» og «en høflig pike». Frå plassen sin høgt oppe i eit tre ser ho nashornet komme gåande i «en fotsid frakk».

Dei nostalgiske, nesten gammalmodige skildringane gjev teksten eit tidlaust preg. Stiltonen kan verke framandgjerande i starten, men fungerer betre i den underlege verda nashornet har nøkkel til:

Tankelesande shimoolar glir lydlaust over mosen. I skuggane græt dei namnlause. Alle slags skapningar slynger seg over sidene, i Hansens karakteristiske strek. Nokre finst i draumar, andre i mareritt. Emilie undrar seg over det ho ser, på ein slik måte at lesaren får slå følgje. Seint går den vesle karavanen gjennom fantasiverda. Forteljinga er vidopen og tener til å halde håp og draumar levande. Treng vi leve slik vi gjer? Kva kunne vere mogleg?

Janne Karin Støylen

Janne Karin Støylen er bonde og litteraturvitar.