Ungdomsroman

Leah og Levi Henriksen:

Vinter på Savannen

Ena
forlag

Eleanor heiter ho, etter Eleanor Rigby i songen med same namn. Ho er 13 år og sørgjer over mor si som har gått bort i kreft. Gravsteinen har tekst frå ein anna Beatles-låt, om den svarte fuglen med knekte vengjer. Lydspora skaper stemning og pregar personskildringane, slik vi ofte ser det hjå Levi Henriksen.

Vinter på Savannen er skriven saman med dottera Leah Henriksen. Ho kombinerer russetid med boklansering no i mai. For to år sidan inviterte sjefredaktør Kristin Jobraaten i Ena forlag far og dotter til å reise saman til naturreservatet Masai Mara i Afrika. Redaktøren såg for seg boka som ein samtale mellom far og dotter om kva som er viktig i livet.

Miljøet, mamma og Moses i klassen er det viktige i livet til Eleanor. Stefaren Dag fortel at han har lova mora å ta henne med til Afrika. Danningsreisa til masaireservatet fylgjer fleire spor: ei kjærleikshistorie, ei forteljing om sorg og tap, ein dystopi, ei reiseskildring. Historia er handlingsdriven, men samtalen er viktig – ikkje berre mellom far og dotter, men også mellom Eleanor og dei andre personane. Dessutan sliper Eleanor tankane mot musikalske og litterære referansar, som blir ein del av refleksjonane lesaren får ta del i.

Sorgarbeidet overtyder ikkje som motiv. Forteljinga kunne vore like fengslande med eit mindre tragisk utgangspunkt.

Eleanor er omdreiingspunktet i historia, kanskje har Leah også vore det i skrivinga? Eg-personen er ein sint og sår, tøff og truverdig trettenårig. Dette far/dotter-prosjektet har ei av dei friskaste forteljarstemmene i bokvåren.

Janne Karin Støylen

Janne Karin Støylen er bonde og litteraturvitar.