Filmfjes

I dag kjem ein ny barnefilm av Grethe Bøe-Waal. Premiereklare Operasjon Mumie er til liks med Operasjon Mørkemann frå i fjor basert på ei bok av Jørn Lier Horst. Bøe-Waal regisserte òg Operasjon Arktis i 2014, som blei vist på Sundance og vann Amanda for Årets barne- og ungdomsfilm, men hausta ei lite entusiastisk melding i Dag og Tid. Ifølge Nordic Women in Film har Bøe-Waal vore ein aktiv deltakar i debatten om talet på kvinner i norsk film.

H.T.

Sjå på nett no

(Netflix) Det var så mykje eg likte ved sesong 1 av The Sinner, særleg at me kjende gjerningspersonen frå starten, men ikkje kva som låg bak, ein vri som fungerer usedvanleg godt. Så kan sesong 2 vera like bra? Ja! Hurra! Du må kanskje bita i deg at Bill Pullman plirer vel mykje med auga, men så han har til gjengjeld fine auge, då.

B.A.

Tre på topp

Dokumentarfilmar om kurdiske kvinner som slo IS og no blir angripne av våre allierte med våre våpen.

1) Radio Kobani. Reber Dosky 2016. Unge jenter som driv radio, er sentrale i å skape forsoning og demokrati etter sigeren mot IS. Filmen er full av eit håp som døyr no. Han ligg framleis på VGTV.

2) Gulistan, Land of Roses. Zayne Akyol 2016. Denne poetisk vakre filmen er stillfaren og strålande sterk. At krigarane er kvinner, gjev ekstra frykt til IS.

3) Commander Arian. Alba Sotorra 2018. Arian leiar styrkane sine mot IS, sjølv om ho har blitt skoten fleire gonger. Feminismen i frontlina er forrykande.

H.T.