Barnebok

Marius Horn Molaug og Kristoffer Kjølberg (ill.):

Verdens verste leirskole

Gyldendal

Radarparet Ruben og Kent har store forventningar til det som skal vise seg å bli verdas verste leirskule. Rektor er alt på plass når bussen med skuleelevar stoppar og slepper dei av midt i granskogen. Mobildekninga er elendig, men det har lite å seie. Snart vert både snop og telefonar konfiskerte.

Med denne utgjevinga tel Verdens verste-serien sju bøker. Ruben og Kent er gjennomgangsfigurar i alle bøkene. Både typeteikningar, miljø og plot minner om landeplaga frå Langåsen pensjonatskole med Stompa og Bodø i tilsvarande roller. Lektor Tørrdal har fått ein verdig arvtakar i den infernalske rektoren på leirskulen.

Stikkordet er leik. Forfattar Marius Holm Molaug og illustratør Kristoffer Kjøllberg snur og vender på bokstavar, ord og uttrykk både i teksten og i teikningane. Dei strør om seg med referansar, frå Frankenstein til Knerten. Forteljinga er tettpakka med humoristiske poeng, heseblesande og heilt utan daudpunkt. Ikkje alt er like vittig, men den leikne kreativiteten er sjarmerande, og bøkene er populære blant lesarane.

Marius Horn Molaug er til dagleg norsk redaktør for Donald Duck & co. Verdens verste-bøkene kan lesast på same måte som den kjende teikneserien: Dette er rein underhaldning, men det finst meldingar mellom linjene. Å setje opp eit telt, fyre opp eit bål og hauste av naturen vert reine helvetesveka. Ungane er hjelpelause med kart og kompass, og ingen hugsar naudnummeret når det verkeleg knip. Hakkespettboka kan vere verdt å hente fram att for internettgenerasjonen.

Janne Karin Støylen

Janne Karin Støylen er bonde og litteraturvitar.