Dikt

Jørn H. Sværen (red.):

Den engelske kanal 2019

Kolon

«Den som graver etter gull, graver opp mye jord og finner lite», heiter det i eit Heraklit–fragment ein finn trykt i Den engelske kanal 2019. Den engelske kanal kan kallast eit årleg utkomande poesitidsskrift eller kanskje heller ein antologi over samtidspoesien. I år føreligg siste og sjuande utgåve som ifølgje redaktøren blei etablert fordi han ikkje fann spor av poesi når han las norske tidsskrift.

Ny poesi

Det er ikkje tvil om at den årvisse antologien har vore både eit laboratorium for ny poesi og ein arena for å presentere utanlandsk samtidspoesi på norsk. Tvillaust vil han verte djupt sakna.

Mykje jord må både bidragsytarane og redaktør ha grave opp, med tanke på breidda og kvaliteten i det føreliggjande resultatet, som femnar om både visuell og verbal poesi. Det er interessant å sjå at den førsokratiske filosofen Heraklit glid så godt inn i selskapet av samtidspoetar. Om ein ser litt stort på det, kan ein seie at det som samlar bidraga i Den engelske kanal 2019, er ei interesse og ein refleksjon over fortida, døden og forsvinninga.

Utanlandsk lyrikk

I Den engelske kanal finn ein representantar frå Sverige, Tyskland, Danmark, Skotland og Frankrike, og sjølvsagt fleire yngre norske røyster. Nokre er gjengangar her. Dei 17 bidraga syner ikkje berre fram ein større geografisk variasjon, men også eit rikt spenn i poetiske mentalitetar og uttrykksmåtar. Frå ein nærmast frenetisk og vill humor med underfundig politisk snert i Yngve Pedersens sørgjedikt over fylkeskommunen til svensk-tyske Cia Rinnes leikande tankedikt som freistar å tenkje gjennom kva ei setning er og kan vere. Den unge norske poeten Casper André Lugg står fram i eit anna stilleie enn ein er vorten van med. Ein personleg favoritt er den skotske poeten Ian Hamilton Finlay (1925–2006), som med sine kirurgiske «deskripsjonar» og konsentrerte stillbilete gjer funn i ei samtid som har ruinkarakter, i ei dikting som anten forvandlar den moderne verda til eit arkeologisk felt eller tilfører fortida ein potensiell og sjokkarta vald: «En statue av Apollon, naken, med en maskinpistol i hendene.»

Sindre Ekrheim

Sindre Ekrheim er lyrikar og fast bokmeldar i Dag og Tid.