Ungdomsroman

Elen
Betanzo:

Nordsjøen

Gyldendal

I fjor haust var søndagsunderhaldninga på TV-skjermen prega av historia om klondyketida i Stavanger. Den ferske ungdomsromanen Nordsjøen bit TV-serien Lykkeland i halen. Far til Mathias har kome for lett til dei store pengane i oljebyen. No står fasaden for fall.

Ein måndag i oktober kjem Mathias heim frå skulen og ser to ukjende bilar utanfor huset. Politiet reiser av garde med datamaskiner og papir. «Det er bare en tullete misforståelse», seier far.

Mathias trur og tvilar. Han ser på far sin – på alfahannen som surfar og spring. Han ser på seg sjølv. Liknar han på pappa?

Elen Betanzo skildrar identitetskampen i skuggen av ein komplisert farsfigur på ein innsiktsfull måte. Gjennom blikket til Mathias endrar både foreldra og venene seg. Alt kjem i spel, ingenting ligg fast.

To innvendingar melder seg gjennom lesinga. Den eine er at romanen innbyr til ei anna lesaroppleving enn den som ventar. Kriminalsaka kjem fort i bakgrunnen. Den andre er at delar av teksten ser ut til å vere skriven for å tekkast lesarane, i vel stor grad. Den sterke strengen i historia vert somme tider skjemd av seksualisert støy.

Janne Karin Støylen