Julehefte

Herborg Kråkevik (red.)

Barnas Juleroser

Samlaget

Jula er ei tid for magi og mirakel. Det magiske finst for den som diktar og leikar. I den tredje utgåva av Barnas juleroser har redaktør Herborg Kråkevik valt magi som tema, med von om at historiene og bileta skal hjelpe lesarane med å dikte seg ei magisk jul.

Både teikneseriane, dikta og novellene låner og leikar seg med kjende forteljingar, frå juletradisjonen og frå eventyra. Heftet inviterer dermed til ei leiken og humørfylt lesing, til å bruke fantasien og til å oppdaga det magiske, der det finst.

Tydelegast og finast peikar Simon Stranger i ei uventa retning i ei forsonande løysing på vonbrotet som ventar oss alle: Nissen finst ikkje.

Juleheksa til Jenny Jordal er eit humoristisk høgdepunkt i heftet. Ho er midt i julevasken og kan slett ikkje ta seg tid til å følgje mystiske stjerner og helse på magiske barn. Nyskrivinga av juleevangeliet er både fornøyeleg og til ettertanke.

Sjølv om heftet er heilt utan dødpunkt og fyllstoff, er det på forunderleg vis sett av stor plass til lesaren. Variasjonen i sjangrar inviterer til ulike lesemåtar. og ulike uttrykk hjelper oss å hente opp stemningar og minne. Det er mykje muleg at juleheftet kan inngå i den magiske formelen som ringer jula inn att slik vi drøymer om, saman med tid og fred til å lese.

Janne Karin Støylen

Janne Karin Støylen er bonde og litteraturvitar.