Biletbok

Randi Fuglehaug og Nora Brech (ill.):

Skalla

Samlaget

I biletboka Skalla møter vi Iben den dagen ho har bursdag. Ho prøver å få selskapet til å vare så lenge som råd. På neste oppslag skjønar vi kvifor. Morgonen etter lyt ho reise på sjukehus.

– Det kjem til å bli litt tøft no framover, seier doktor Kvitskjegg.

Inn frå naborommet kjem ei jente med eit stort smil, men heilt utan hår. Skalla-Malla syner Iben magiske rom på sjukehuset, fulle av snop, dans og diskomusikk.

Sjukdom og sorg er ein del av pakken, også i eit barneliv. Skalla viser korleis barn kan gje og ta imot trøyst når nokon er sjuke og redde.

Særleg i illustrasjonane er boka i augehøgd med barnelesaren. Nora Brech brukar perspektiv og utsnitt på ein slik måte at vi aldri ser ansiktsuttrykka eller kjenslene til dei vaksne. Det er opplevinga Iben har av å bli sjuk, ta medisin og miste håret som vert formidla.

Skalla-Malla dreg Iben med seg frå side til side, frå rom til rom. Dei smakar på blomsterdrops og dansar med hekser og cowboyar. Bileta er frodige og fargerike. I møte med fantasien til lesaren vil dei få både smak og lukt. Det magiske sjukehuset vert like ekte som det medisinske. Forteljinga spelar på den fine evna borna har til å gå inn og ut av leik og draumar, utan å ta stilling til kva som skjer i røynda, og kva som skjer i fantasien.

Janne Karin Støylen

Janne Karin Støylen er litteraturvitar og bonde.