Teikneserie

Håvard S. Johansen:

Troll­jegeren. Myrdraugen kommer!

Cappelen Damm

Trolljegeren er basert på den norske filmen med same namn frå 2010. Trolltryggingstenesta slit med stramme budsjettrammer, sjefen har dessutan trøbbel på heimebane. Dottera Frida likar seg dårleg på skulen og oppfører seg deretter. Trolljegeren sjølv meiner laget treng forsterkingar, men løysinga blir ikkje heilt slik han har tenkt seg.

Filmen fekk overstrøymande mottaking då han kom ut for snart ti år sidan. Trolla høyrer heime i den norske folkekulturen. Gjennom spelefilmen fekk dei også ein etterlengta plass i den moderne populærkulturen. Giganten var på plass att i humorsatsinga Magnus på NRK sist vinter. Dette albumet hentar ny inspirasjon frå dei gamle norske folkeeventyra. Kristenmannsblod må skaffast i tønnevis for å vinne kampen mot kjempene.

Å utvikle teikneseriar baserte på sjangerfilmar er ein god idé, med mange moglegheiter. Håvard S. Johansen var med i det kunstnarlege teamet kring filmen, i framhaldet skriv han fram same snerten i dialogane. Myrdraugen er òg meisterleg framstilt, men den dramatiske linja er vanskeleg å følgje. Til dels er det også krevjande å avkode teksten i boblene. Handlinga heng i lufta når forteljinga er slutt og lovar lesaren eit framhald. Det vil gje historia høve til å falle betre på plass.

Janne Karin Støylen