Biletbok

Kalle Güettler, Rakel Helmsdal og Áslaug Jónsdóttir (ill.):

Monsterknipe

Skald forlag

Dei populære bøkene om Veslemonster og Storemonster er resultat av eit nordisk samarbeid mellom islandske Áslaug Jónsdóttir, svenske Kalle Güettler og dansk-færøyske Rakel Helmsdal. Når dei tre møtest for å lage ei ny forteljing, skriv dei ut historia på kvart sitt språk. Forteljinga vert ikkje omsett, derimot held dei tre forfattarane på særpreget i språket og i den personlege forteljemåten når dei formar teksten.

No til sommaren kjem to nye bøker i serien ut i nynorsk omsetjing ved Tove Bakke. Monsterknipe er den ferskaste av desse to.

Sidan sist har eit tredje monster entra scena: Luddmonster på svensk. Raggmonster på norsk. Alt her syner Tove Bakke styrken sin som omsetjar. Det lydsterke, biletrike namnet ligg godt i munnen, er kjekt å lese høgt, herme etter og leike seg med.

Så langt ut i serien som i bok nummer ni er det kjærkome med eit uromoment. Raggmonster gjev ny sprett til samspelet mellom dei to monstera vi kjenner frå før.

Uttrykket er energisk og kraftfullt. I både tekst og illustrasjonar er kontrastane ei drivkraft: mellom det svarte og kvite, mellom det store og det vesle, ispedd klare fargar og organiske former. I teksten er replikkane ofte sette opp med «monsteraktige» fontar med ulik skriftstorleik alt etter styrken i utropet.

Trass i, eller kanskje fordi, at monster ikkje finst, er det lett å identifisere seg med kjenslene dei viser, og lære noko av løysingane dei finn når to gode vener skal gje plass til ein tredje.

Janne Karin Støylen

Janne Karin Støylen er litteraturvitar og bonde.