Dokumentar

Regi: Diana Neille

Influence

Produsentar: Bob Moore og Neil Brandt

Vi trur at vi blir styrte av dei vi vel til å styre oss, men er det slik? Denne dokumentaren om den engelske spinndokteren Tim Bell fortel ei skremmande historie om korleis ein mann og PR-firmaet hans manipulerte opinionen og vann politisk innverknad nasjonalt og internasjonalt – heilt til dei utløyste raseopptøyar i Sør-Afrika og selskapet kollapsa.

I filmen fortel Bell, som døydde i fjor, ope og byrgt korleis dei gjekk fram, og kor lett det var å selje tenestene sine til politiske leiarar. Han blir, med rette, ståande att som den store skurken. Dei det blir mindre tale om, er statsleiarane, politikarane og partia som kjøpte desse tenestene og i det minste måtte ane korleis Bell og folka hans gjekk fram.

Det handlar om å pynte på sanninga, manipulere folk, spele på kjensler og gi blaffen i moral. Strategisk kommunikasjon, heiter det på fint. Det er viktig at slike filmar kan avsløre dette øydeleggjande spelet. Men står vi betre rusta til neste møte med desse triksa? Sanneleg om eg veit. Verda vil jo bli lurt.

Jan H. Landro