Dora Garcia, Love Comes From The Most Unexpected Places

Trondheim Kunstmuseum, Bispegata

26. mai–16. september 2018

Spanske Dora García stiller spørsmål ved om kunst kan samanliknast med kjærleik. Mange av tilnærmingane til temaet er overraskande. I tillegg til å sjå filmar i museet, kan du fram til midten av september møte på fire sjarmerande og hjelpsame menn som vandrar ikring i byen. Verket er basert på ein spionstrategi som var nytta av DDR under den kalde krigen, der sjarm var eit viktig verkemiddel for å lokke løyndommar ut av innbyggjarane.

Av filmane vil eg særleg framheve The Joycean Society. I filmen vert vi kjende med ei av lesegruppene ved Zürich James Joyce Foundation. Gruppa har granska boka Finnegans Wake (1939) av James Joyce kvar veke gjennom 30 år.

Også vist ved Sogn og Fjordane Kunstmuseum.

Pariserne

Lillehammer Kunstmuseum

26. mai–30. september

I åra 1908–11 var eit tjuetals norske kunstnarar elevar hos målaren Henri Matisse i Paris. Då dei kom heim att, var det i starten stor motstand mot den ekspressive, fargesterke stilen dei hadde lagt seg til. Men skepsisen vart gradvis erstatta med begeistring. Utstillinga tek føre seg dei mest sentrale av dei såkalla Matisse-elevane: Jean Heiberg, Henrik Sørensen, Per Krohg og Axel Revold. Dei kom til å dominere norsk kunstliv gjennom fleire tiår. Utstillinga «Pariserne» femner over meir enn 150 måleri, mange er ikkje tidlegare vist i Noreg.

Og jeg skal ta deg med
til Paradiset

Kunstmuseet KUBE, Ålesund

4. mai–30. desember

14 verk av norske og internasjonale kunstnarar tek på forskjellig vis opp eit dagsaktuelt samfunnstrekk: religion og martyrrolla. Kuratorane har spurt seg kvifor nokon vel å ta sitt eige liv, og ta andre med seg, for ei sak dei trur på.

Verka tilbyr ulike perspektiv på historiske hendingar og etablerte framstillingar, i tillegg til arbeid som spenner frå direkte ytringar til meir poetiske skildringar av paradiset.

Contemporary Chaos

Vestfossen Kunstlaboratorium

5. mai– 2. august og 18. august– 23. september

60 kunstnarar frå fire kontinent vert presenterte over fire etasjar i den tidlegare papir- og cellulosefabrikken på Vestfossen. Verka viser det store mangfaldet i samtidskunsten i uttrykk så vel som i val av medium: måleri, foto, video, performance og digre installasjonar.

Sverige

A Grin Without a Cat, Borås Internationella
Skulpturbiennal 2018

Borås Konstmuseum, Sverige

26. mai–3. september

Verk av kunstnarar frå ni ulike land stiller ut skulpturelle arbeid i museet, så vel som ute i byrommet. Tittelen viser til det surrealistiske universet frå «Alice i eventyrland». Her møter vi former som lurer auget og gjenstandar vi kjenner att frå kvardagen, men som vert viste fram på uventa vis.