Ei virtuell verd

BIFF har ei eiga avdeling med virtuelle kortfilmar. Ein av dei lèt oss stige inn i Hans Børlis verd. Der står du med spesialbriller midt inne i ei glenne i skogen, med ein nying brennande ved sida av deg og på alle kantar omgitt av skog, som du også med øks i hand får høve til å tynne ut. Heile tida får vi høyre Børli-dikt, og når ei stemme les eit dikt om å stige opp mot himmelkvelven, er det som verda forsvinn under deg og du nesten mister balansen. Ei medvitsutvidande oppleving, langt meir effektfull enn VR-filmen om Edvard Munchs soloppgang.

Hundegalskap?

Nytt på årets BIFF var hundekino. Hundeeigarar var inviterte til å ta med dyra sine og sjå filmen Pick of the Litter på Cinemateket. Det er ein dokumentar om eit kvalpekull på fem labradorar som går gjennom ei toårig opplæring for å bli førarhundar. Om lag tjue hundar hadde fått med seg eigarane sine og sat til dels andektig og følgde dei fem sjarmørane gjennom terpinga og treninga. Det må ha gjort inntrykk, for ingen av gjestane lét etter seg visittkort av noko slag. Dei ville heller ikkje la seg intervjue etter framsyninga.