Feministisk dystopi

Feministiske dystopiar er trenden som forleggjarar og bokhandlarar spår vil forme britisk litteratur i 2018. Romanen Kraften av Naomi Alderman blir lyft fram som ei av bøkene som har bana veg for den nye trenden. Romanen handlar om superkvinner som endeleg tek innersvingen på menn. Ein dag oppdagar kvinner over heile verda at dei har ei ny kraft: Hendene deira kan skyte elektriske ladningar – dei kan lamme, ja drepa menn.

«Vi har lenge sett denne trenden i ungdomslitteraturen som for eksempel i Hunger Games. Men nå kommer det en bølge bøker av høyere litterær kvalitet og som henvender seg til en mer moden lesegruppe», seier Torgeir Husby, marknadssjef i Press forlag til bok365.no

Nok ein litteraturpris til Dale

Jan Kristoffer Dale er vinnaren av Språklig samlings litteraturpris 2017. Han får prisen for novellesamlinga Arbeidsnever, som er debutboka til Dale. Det er den tredje litterære prisen boka haustar. Dette seier komiteen om språket i boka: «Arbeidsnever er skrevet på gjennomført radikalt bokmål. I tillegg er direkte tale gjengitt på lokal dialekt. Samlinga viser tydelig at vellykka skjønnlitteratur og talemålsnært språk er helt forenlig.»

Sony orsakar

Sony, som er produsenten bak animasjonsfilmen Peter Kanin, bed om orsaking for ei scene i filmen der den vidgjetne kaninen vert bombardert med bjørnebær. Kaninen er allergisk mot bæra, og det går ille. Han får ein allergisk reaksjon og må ty til medisin. American Kids with Food Allergies Foundation kallar scena «skadeleg» og seier scena «oppmodar folk om å ta lett på det med allergiar». Filmen er basert på dei populære barnebøkene til Helene Beatrix Potter.

ronny@dagogtid.no