Slasherkomedie

Regi: Reinert Kiil

Juleblod

Stig Henrik Hoff, Sondre Krogtoft Larsen, Jørgen Langhelle

Reinert Kiil er ein nordnorsk filmskapar som lagar stilreine lågbudsjettfilmar med makabre skrekkelement og tydelege nikk til inspirasjonskjeldene. Slasherkomedien Juleblod er ikkje noko unntak. Her er for eksempel veninnegjengen som reiser til eit avsidesliggande strøk, i vårt tilfelle til Honningsvåg, for å feire jul. Her er seriemordaren med blodig appetitt og umetteleg drapslyst, i vårt tilfelle ein mann utkledd i nissekostyme. Og her er den avgjerande kampen mellom slaktaren og «sistejenta».

Eg skal ikkje avsløre kven som overlever blodbadet. Meir interessant er det å gå inn på kva som skjer undervegs. Forutan veninnegjengen er vi i spora til etterforskarane Thomas Rasch (Hoff) og Terje Hansen (Krogtoft Larsen) og kampen deira for å kome nissen (Langhelle) i forkjøpet. Nissen er ein vaskeekte antiheroisk karakter, som opererer med ei liste over kven som har vore «snille» eller «slemme». Og han er nærast umogleg å ta livet av.

Nettopp derfor kunne eg tenkt meg ei meir reindyrka forteljing om veninnegjengen og drapsmannen, heller enn å trekke inn den heseblesande politijakta i tillegg. Dramaet og intrigane jentene imellom er nok til å drive historia framover. Det er også her filmen er på sitt mest humoristiske, og introduserer oss for nordnorske bygdetullingar med ramsalte gloser og bratt flaskeføring. Desse er sånn sett meir minneverdige enn nissen, som trass i at han er «manifestasjonen av vondskap», slaktar ned folk utan at eg verkeleg blir redd han.

Sondre Åkervik

Sondre Åkervik er skribent
og student.