Dokumentar

Regi: Matthew Heineman

City of Ghosts

Distributør: Tour de Force

I 2014 gjorde Den islamske staten (IS) byen Raqqa i Syria til hovudsete. Folk utanfor hadde ingen informasjon om kva som skjedde i «IS-land», sett vekk frå terrornettverkets eigen propaganda. Det var før ei gruppe grasrotjournalistar som kallar seg Raqqa Is Being Slaughtered Silently, kom på bana. Med mobilkameraet som våpen begynte dei å laste opp videoar og bilete av det brutale regimet, som svara med å drepe alle som kunne ha tilknyting til journalistane.

City of Ghosts går klår noko av det som gjorde ein annan kinofilm om Syria, Cries from Syria, til ein i overkant enkel analyse av den komplekse krigen. City of Ghosts er nøktern og skildrande, utan å demonisere. Først og fremst er det ein sterk humanisme som driv filmen. Vi får eit medrivande innblikk i livet til journalistane i eksil og den konstante frykta dei lever under. Det filmen gjer best, er å vise at midt opp i alt elendet er vi alle menneske. Det gjer vondt å sjå masseavrettingane til IS, men like hjarteskjerande er det å sjå den psykiske valden mot hovudpersonane.

Er det éin som personifiserer denne valden, er det talsmannen Abdalaziz Alhamza, der han til sist sit skjelvande og røykande på rommet sitt. Eit samanbrot vi som sjåarar har venta på. Her kunne filmen ha slutta, men til sist har han også ei anna historie å fortelje. Ei om at livet har to sider, eit glimt av håp, same kor mykje vondt ein har opplevd.

Sondre Åkervik

Sondre Åkervik er skribent, student og fast filmmeldar i Dag og Tid.