Drama / krim / musikal

Regi: Todd Phillips

Joker: Folie à Deux

Med: Joaquin Phoenix, Lady Gaga, Catherine Keener, Brendan Gleeson
Kinofilm

Jokeren (Phoenix) er tilbake. Arthur Fleck sit inne på ein institusjon for «kriminelle sinnssjuke» etter drapa skildra i storsuksessen Joker (2019). No kjem rettssaka. Er han forstyrra av dobbel personlegdom, eller spelar han roller?

Toppadvokaten Maryanne (Keener) set pengane sine på det første. Den brutale vakta Jackie (Gleeson) set pris på show og tek Arthur med seg til songterapi. Der ventar Lee (Gaga), som er fascinert av kjendisdrapsmannen. Kjærleiken kjem fort.

Undergang i USA

Tematisk går Joker: Folie à Deux i same tralten som sist. USA ser ut som eit søkkande skip. Svolten på skandalar er stor. Sannkrim, jag etter merksemd og stjernedyrking er kopla på valdskultur, utanforskap og ein roten fengselsindustri blanda med tvangsmedisinering på samleband.

Todd Phillips teiknar eit grelt bilde av landet sitt, som verkar som reine gaukereiret. Visuelt går den gilde stilen frå syttitalet att i denne varianten av Gotham. Det kler miljøskildringa.

Kjærleikshistoria er ein litt teit vri på kjærleik ved fyrste blikk frå ein drapsmann, men Joaquin Phoenix er ein stor skodespelar. Andletet er ikonisk og eig kinolerretet. Han er ein av dei store i rekkja av Jokerar, saman med Jack Nicholson og Heath Ledger. Sist vann han Oscar-pris.

Mørk melodi

Lady Gaga beviste for fullt at ho er skodespelar i tillegg til songar med A Star Is Born. Dei to er stort sett dei einaste som syng i filmen. Det gjev eit greitt skilje. Gaga er god, men skin ikkje slik som i gjennombrotet sitt. Glade songar er vridde til tristessen som gjennomsyrar filmen. Valet av låtar strekar under tematikken.

«That’s Entertainment» med Judy Garland er eit døme på signal til publikum om kva filmen handlar om. I tillegg kjem slagerar knytte til Fred Astaire, Frank Sinatra og andre legender frå underhaldningsbransjen.

Hildur Gudnadóttir vann Oscar for førre Joker-film og pregar lydsporet igjen med originalmusikk. At ho skreiv for Tár i mellomtida, vitnar òg om at ho er blant dei fremste komponistane av filmmusikk. Ho har tyngda filmen treng.

Joker: Folie à Deux er heilstøypt og god. Eg ser likevel mørkt på at kvar suksess i USA krev ein oppfølgjar. Manglande mot til å tenkje nytt sit djupt hjå dei mest pengesterke aktørane i filmbransjen, som elles. Mykje er rote i republikken.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.