DRAMA

Regi: Michaël R. Roskam

Racer and the Jailbird (orig.tittel: Le Fidèle)

Med: Mattias Schoenaerts, Adèle Exarchopoulos, Erik De Staercke

Gigi (Schoenaerts) er bankranaren som voks opp på ungdomsanstalt saman med andre lause fuglar. Bibi (Exarchopoulos) er overklassejenta som køyrer racerbilløp og har alt: pengar, prestisje, skjønnheit. Alt dette har også Gigi – berre at han lyg om, vel, alt. I ei scene er dei to ute på landevegen i Bibis Porsche 911. Ho har mistanke om at han har ureint mjøl i posen, men avhøyret stoppar like fort som ho blir stoppa for råkøyring. Eit bryllaup er på trappene.

Gigi skal berre gjennomføre eit siste brekk først. Eg trur ikkje eg avslører for mykje når eg seier at dette ikkje går heilt etter boka. Og det er berre starten på nedturen for alle involverte. Det er ikkje grenser for kor ille det går med hovudpersonane, kor uheldige dei er, kor destruktive dei er overfor kvarandre. Kjærleiken gjer blind, og dette er ei kjærleikshistorie av den tragiske sorten. Hadde filmen halde seg sterkare til dette melodramaet og freista seie noko sant om livet, kunne eg kanskje falle for forteljinga. Som resultatet har blitt, heng ikkje historia på greip.

Det verkar som om regissør Roskam har gått til Hollywood-gryta og grådig teke føre seg i håp om at berre han rører godt nok rundt med tresleiva, vil ingrediensane passe saman. Men ein dæsj bankran, litt oppveksthistorie, ei klype biljakt, ei teskei grim skildring av den belgiske kriminelle underverda – ikkje akkurat reklame for muslimane i landet – og rause mengder sex, blir ikkje nødvendigvis god film. Det blir i staden ei tynn melodramatisk suppe, med ein farse av ein slutt. Nemnde eg at filmen er altfor lang?

Sondre Åkervik

Sondre Åkervik er frilans kulturjournalist og fast filmmeldar i Dag og Tid.