Dokumentarfilm

Regi: Line Hatland

Bortebane

Med: Ungdom på Norway cup
Kinofilm

Bortebane følgjer fem ungdomar frå trening på heimstaden til dei avgjerande augneblinkane på Ekebergsletta under Norway Cup 2019. Alle er keitete fjortisar med skyhøge forventingar til siger i giganttevlinga. Inni er dei såleis like.

Fotballfedrar

Rollegalleriet er ei bragd. Filmskapar Line Hatland kjem nær dei alle. Stortalentet Anna har sin eigen sunnmørske fotballpappa som trenar. Det er hardt. Khalidi frå USA spelar for eit lag frå Tanzania for å oppfylle draumen til faren, ein tanzanianar som har slukt konkurransejaget til det nye landet. Tap er tabu.

Yu frå Chengdu spelar for æra til den døde far sin. Som kaptein og berebjelke kan ho ikkje felle tårer framfor korkje familien eller lagkameratar. Jentene frå Sichuan synest ikkje det smell av norsk kantinemat, graset er definitivt brunare enn i heimlandet, og den dumme dommaren er truleg norsk.

Kjekk reklame

Afnan er kaptein på Jerusalem Girls og uroar seg for om brørne blir tatt av israelsk politi om dei vågar seg utom døra heime. Ho spelar for palestinsk ære. Det er ei tung bør.

Den brasilianske benkeslitaren Fred har øvd ved bassenget, men slit med fokus. Det er så mange jenter å blunke til.

Norway Cup rommar mange opplevingar, frå sniktur i kiosken etter snop til hjarteskjerande straffekonkurransar. Bortebane er reinaste reklamen for turneringa, eller ein rekrutteringsfilm for dei unge.

Eg går fem på og har klump i halsen heile vegen. Det er rørande og kjekt. Ein lever med opp- og nedturar. Personlege ambisjonar om pokalar heng høgt, men vennskap og felles opplevingar er større. Heldigvis finst det fotball utan VAR, superligaar og korrupte leiarar.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.