Krim/action

Regi: Steve McQueen

Widows

Med: Viola Davis, Elizabeth Debicki, Colin Farrell, Bryan Tyree Henry

Eit ran går gale og att sit fire enkjer, utan pengar og med Chicagos’ mest korrupte politikarar på nakken. Ringleiarenkja Veronica (Davis) får overlevert informasjon som kan redda henne og dei andre, om dei berre følgjer i fotspora til dei omkomne ektemennene.

Texas i Chicago

Frå sekstitalet og godt utover dei neste tiåra vart det berykta området kring Sletten i Bergen kalla Chicago. Ting har forbetra seg i bydelen på Vestlandet, men i det 18. distriktet i den tredje største byen i USA står det dårleg til. Ei knust kneskål er barnemat mot det representant Manning (Henry) byr på for å koma til makta. For å få opp pulsen på historia har regissør McQueen hanka inn krimforfattar Gillian Flynn, kjent for kassasuksessar som boka og filmen Gone Girl og TV-serien Sharp Objects. Manus er basert på den britiske krimgiganten Lynda LaPlantes bok og britisk TV-serie med same namn. På elegant foto finn ein Steve Bobbit, ein gjengangar bak kameraet på McQueens tidlegare triumfar som 12 Years a Slave og Shame. Kva kan gå gale?

Dyr moro

I Chicago styrer dei tilsynelatande etter Murphys lov når ikkje total lovløyse regjerer. Det blir for mykje som går gale, rett og slett. Eg skjønar freistinga til å laga film av alt vanvitet, men det blir for stilisert og dermed ikkje så medrivande som eg kunne håpa på. Til å fordriva ein søndagskveld fungerer Widows godt nok, men så dyrt som popkornet er no til dags, er det knapt verdt det.

Brit Aksnes

Brit Aksnes er frilans kulturarbeidar og fast filmmeldar i Dag og Tid.