SKREKKFILM

Regi: Lorcan Finnegan

Vivarium

Med: Imogen Poots, Jesse Eisenberg
Kinofilm

Gemma (Poots) og typen Tom (Eisenberg) skal finne seg ein heim i den grotesk dyre irske bustadmarknaden. Ein stivt smilande eigedomsmeklar tek dei på tur til ein absurd straumlinjeforma forstad. Alt er så karikert at dei må le. Låtten sit snart fast i halsen, når dei slit med å finne vegen ut av den einsformige labyrinten. Tenk å bli fanga i forstaden!

Regissør Lorcan Finnegan etablerer tematikken fint. Gemma lèt borna ho er lærar for, leike at dei er tre, medan Tom syslar som gartnar og gravlegg ein fugleunge som er sparka ut av reiret av ein gauk. Dei levande opningsbileta får fort ein kunstig kontrast. Kva menneskelege trekk kjem naturleg fram i djupt unaturlege omgjevnadar? Ein saknar tidsnok dei tidlege rytmane av rocksteady frå Dandy Livingstone og Desmond Dekker. Tittelen viser at nokon kjem til å vere isolerte og bli eksperimenterte med. Har du nyleg vore innestengd i eit stort sosialt eksperiment, skal du vera glad du ikkje var i eit vivarium. Ein blir fort litt galen. Det er heilt naturleg.

Psykologi

Finnegan har nemnt inspirasjonskjelder frå David Attenborough via René Magritte til The Twilight Zone. Mange vil òg lure på, undervegs, om vi finn ein dose The Matrix eller The Truman Show. Denne filmen er laga i mindre skala, men Finnegan har skapt eit stilreint univers av ein styggeleg strigla normal. Det kjem råkande dryp av mørk humor. Stort sett sit ein med ei tilsikta kjensle av uro. Ein framand krabat skapar sinne og avsky, som ein galen gaukunge. Uhygga i heimen er djup. Manuset verkar stadig meir funne opp av Ernst Jentsch og Sigmund Freud med idear frå «Das Unheimliche». Den nye figuren er unaturlig og skummelt framand. Som skrekkfilm kjennest Vivarium annleis. Han slår ikkje dei beste frå USA om dagen, men er eit friskt, kvalmande pust. Er du klar for asosial angst, ekkel uro og postapokalyptisk einsemd med tomme gater, er det på tide å vitje kinoen.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.