DRAMA

Regi: Desiree Akhavan

The Miseducation of
Cameron Post

Med: Chloë Grace Moretz, John Gallagher, Jennifer Ehle

Då Cameron Post (Moretz) blir teken i amorøs omfamning med ei anna jente, sender den gudfryktige tanta henne på «avhomsingsleir». Langt til skogs i Montana, midt i det kristenkonservative USA, skal Cameron kurerast for homofilien. Det vil seie, det ordet finst ikkje i vokabuleret til ho som styrer internatet, doktor Lydia Marsh (Ehle), som har lukkast med å «avhomse» broren Rick (Gallagher). Han fungerer som eit lysande eksempel.

Dr. Marsh opererer med ein modell ho kallar «isfjellet», der ungdommane skal grave i det umedvitne og finne årsakene til SSA-en («same sex attraction»). Det kunne like gjerne stått for «skadeleg seksuell aktivitet». Cameron gjennomskodar praksisen. Saman med to andre likesinna dannar ho eit fellesskap. Så godt går det ikkje med dei andre. Sterkast er ei scene der fleire sit i gruppeterapi. Ein av ungdommane siterer eit bibelvers, igjen og igjen, før han deisar i bakken, med spasmar. «De anar ikkje kva de driv med», utbasunerer Cameron.

The Miseducation of Cameron Post viser på hjarteskjerande, men også humoristisk og varmt vis, ei side av det kristenkonservative USA. Regissør Desiree Akhavan gjer dette utan å demonisere dei «vonde» karakterane. Dei er snarare blenda av eiga tru og eigen oppvekst. Som eit nikk til high school-filmnestor John Hughes finn ungdommane kvarandre i galskapen. Nokre av replikkutvekslingane dei imellom er smarte og humreverdige. Som ein kritikk av den institusjonelle praksisen rundt kurering av homofili, blir filmen for nærsynt. Det er som om verda utanfor knapt eksisterer. Kvifor finst slike skular når dei openbert øydelegg unge folk? Det gir filmen aldri eit svar på.

Sondre Åkervik

Sondre Åkervik er frilans kulturjournalist og fast filmmeldar i Dag og Tid.