DRAMA

Regi: Luca Guadagnino

Call Me By Your Name?

Med: Timothèe Chalamet, Armie Hammer, Michael Stuhlbarg

Call Me By Your Name er historia om to unge menn som utviklar eit romantisk forhold. Det er også ei historie om oppvekst, utforsking og oppdaging.

Handlinga er lagd til ein villa i Nord-Italia i byrjinga av åttitalet. Huset tilhøyrer eit elskverdig akademisk ektepar og den 17 år gamle sonen deira, Elio (Chalamet). Kvar sommar inviterer dei ein lovande student til huset. Filmen opnar med at Oliver (Hammer), ein mann i midten av tjueåra, stig ut av taxien som familiens nye sommargjest.

Elio er gravitasjonspunktet i filmen. Vi ser Olivers framkomst frå hans synsvinkel. Vi ser lysta, lengten, sjalusien og skamma i han. Vi ser han tvile og gråte. Vi ser at foreldra ser kva som skjer med han. Og vi ser at dei er gode foreldre. Det sterke blikket for dei små, mellommenneskelege detaljane er noko av filmtriumfen.

Ja, regissør Luca Guadagnino kan skuldast for å vere overestetisarande når han legg så stor vekt på måltid, sigarettar, sykkelturar, natur og åttitalsmusikk. Er det eit altfor idyllisk portrett av ein familie og omgjevnadene? Kanskje, men det plagar meg ikkje, all den tid Call Me By Your Name er så lada med emosjonell sanning og moralsk visdom. Det heile får sitt klimaks i filmens suverene sistedel, som gjer at du sit med ei kjensle av at dette er livet, slik er den første kjærleiken. Du vil aldri gløyme han, eller kome heilt over han.

Sondre Åkervik

Sondre Åkervik er student, skribent og fast filmmeldar i Dag og Tid.