Her er fire kortkorte meldingar:

The Sister (TV 2, 25. mars): Var ho ikkje død likevel? Skrømt, lugubre professorar og ein Russell Tovey som konstant gjer dårlege vurderingar mens han stotrar og ser bedande på kona, systera til ho han drap for fleire år sidan. Fire episodar kunne godt vore berre to.

Nedgravde hemmeligheter (NRK, 26. mars): Eg har ikkje fått sett dei siste to episodane før avisa går i trykken, men som dei førre tre sesongane er dette drivande god krim med fleire samfunnsaspekt, kompliserte gjerningspersonar og detektivar, og eit plott som klarar halda på spenninga om kven som er den verkeleg skuldige her.

Mordene i Pembrokeshire (NRK, 26. mars): Det er ein trend å laga krim basert på sanne hendingar. Trenden med at involverte politifolk skriv manus, er eg meir skeptisk til. Det gir ei viss bismak når denne samtidig skal vera helten i forteljinga. Serien er elles rett fram og interessant, men utan dei store overraskingane, det må kunna seiast.

Bloodlands (TV 2, 3. april): Nord-Irland er interessant, særleg å sjå korleis the Troubles framleis ligg framme i medvitet til folk. Diverre er serien full av overdrivne scenario og lite truverdige løysingar som dreg ned ein elles spennande krim med mange uventa vriar.

Konklusjon: Sjølv om det er sesong fire og Nicola Walker godt kunne variert litt meir dei oppgitte ansiktsuttrykka, er Nedgravde hemmeligheter framleis den mest fengande og spennande av dei eg har sett i forkant.

Ingen av dei andre er direkte dårlege, så har du uavgrensa magemål for påskekrim, er det berre å gle seg.

B.A.