Drama

Regi: Kornél
Mundruczó

Pieces of a Woman

Med: Vanessa Kirby, Shia
LaBeouf, Ellen Burstyn
Netflix

Då Martha (Kirby) og Sean (LaBeouf) skal ha sitt første barn, har dei bestemt at det skal skje med heimefødsel. Når dette går tragisk gale, får dei ein kamp både med seg sjølve, med kjærleiksforholdet og med mora til Martha (Burstyn).

Reint drama

Det er godt at overflata er så fin, for det som ligg under i Pieces of a Woman, er ikkje pent å sjå på. Sorg gjer dei verste ting med folk. Lite hjelper vakkert hus med koseleg kjøken og tregolv når barnet ditt har døydd i rommet ved sida av. To attraktive menneske blir fråstøytande for kvarandre, og spørsmålet er om dei nokosinne kan bli til trekte av kvarandre igjen.

Den drygt to timar lange filmen frå filmskaparparet Kornél Mundruczó og dramatikar Kata Wéber skil seg dramatisk, bokstaveleg talt, frå deira to førre filmar, White God (2014) og Jupiters måne (2017). Dette dramaet har ingen av dei fantasifulle, bisarre og augeoppsperrande effektane, berre reint mellommenneskelege gnissingar og talande blikk.

Straumlinja sorg

Til liks med paret i filmen mista Mundruczó og Wéber sjølve eit barn under fødsel, noko som forklarer handlinga og avviket stilmessig frå tidlegare meisterverk. I heimlandet Ungarn var det i tillegg ei ekte rettssak mot ei jordmor sikta for å ha valda eit barns død, akkurat som i filmen. Så alt er tilgjeve sånn sett, sjølv om det ikkje er nokon stor film dei har enda med under amerikanske Netflix-venger.

Det blir hakket mindre sosialrealisme og hakket meir melodrama enn med austeuropeisk ramme, synest eg.

Det lovar ikkje godt om ein strøymegigant tek frå oss dei storarta, ikkje-amerikanske indiefilmane for å støypa dei i si generiske form. For det er diverre lite som gjer at Pieces of a Woman merker seg ut, trass i at det ikkje er ein dårleg film. Det blir berre unødig glatt, med overklasse-eim og påfølgjande lite spissfindige klasseforskjellsdilemma.

Filmen skal ikkje skuldast for å spela på sentimentalitet, men han hadde kanskje vunne på ein liten dose varme likevel.

Brit Aksnes

Brit Aksnes er frilans kulturarbeidar og fast filmmeldar i Dag og Tid.