Thriller

Regi: Aneesh Chagant

Searching

Med: John Cho, Michelle La,
Debra Messing

Heile Searching er fortald gjennom data- og telefonskjermar. Rollefigurane filmar seg sjølve med mobilkameraet eller kommuniserer via sosiale medium. Det første bilete i filmen er av ein Windows-skjerm og fortel ei familiehistorie på få minutt. Vi følgjer enkemannen David (Cho) og tenåringsdottera Margot (La), som ein kveld ikkje kjem heim frå ei kollokviegruppe. David kontaktar politiet og får med seg etterforskaren Vick (Messing).

David begynner å leite etter dottera gjennom å snoke på datamaskina hennar. Facebook, Gmail, Youtube og Tumblr fungerer som digitale spor i jakta på Margot. Regidebutant Aneesh Chagant har fått mykje, men ikkje nødvendigvis velfortent, skryt for den kreative bruken av teknologi i filmspråket.

Searching startar originalt, men blir etter kvart ein føreseieleg thriller om ein sakna person. Den visuelle forteljinga har lite å seie om teknologiske paradoks, korleis teknologien både frigjer og framandgjer oss. Livet til Margot er i like stor grad levd ut via sosiale medium som i den verkelege verda.

Slike spørsmål dveler derimot filmen aldri ved. Han hastar vidare med plottvistar som gjer det heile til ein klassisk sjangerleik, med klassiske sjangerfeller. Mysteriet skal løysast med bruk av velkjende verkemiddel. Det går ut over den emosjonelle kjernen i filmen: far-dotter-tilhøvet, som aldri får den tyngda det kunne hatt i forteljinga.

Sondre Åkervik

Sondre Åkervik er frilans kulturjournalist og fast filmmeldar i Dag og Tid.