Action

Regi: Tommy Wirkola

What Happened To Monday

Med: Noomi Rapace, Glenn Close, Willem Defoe

I år 2073 har menneska utarma ressursane i så stor grad at styresmaktene innfører ein nådelaus eittbarnspolitikk. Alle søsken blir tatt hand om på ein «human» måte – og frosne ned til verda igjen er berekraftig. Dette er premissen for What Happened to Monday, Tommy Wirkolas nye film om sju identiske søstrer som veks opp i det skjulte. Dei ber alle namnet etter ein vekedag: Monday, Tuesday, Wednesday og så vidare, men ute i den verkelege verda er dei altså same person: Karen Settman (Rapace). Det heile går strålande, til Monday éin kveld ikkje kjem heim. Tuesday får i oppgåve å undersøke kva som kan ha skjedd, og med det er alle i fare.

Tommy Wirkola gjorde Hollywood-suksess med Hansel & Gretel: Witch Hunters (2013). Filmen dyrka dei elementa som Wirkola har vorte kjend for sidan debuten Kill Buljo (2007): blod, gørr og heftige actionsekvensar – element som i høgste grad er til stades i den nye filmen òg.

Dessverre jobbar Wirkola også denne gongen med eit manus som er for svakt, trass i den interessante premissen. Heller enn ei tankevekkande utforsking av eit dystopisk samfunn, blir forteljinga meir eit påskot for å vise Rapace i ulike actionfylte omgjevnader. Ho teiknar i tillegg for karikerte typar. Denne meldaren tar seg i å sjå på klokka: To timar med vald, blod og flate karakterportrett gir lite næring til hovudet.

Sondre Åkervik

Sondre Åkervik er kulturjournalist
og sosiologistudent.