Filmfjes

Av og til dukkar det opp fjes som overraskar, som at bak dei hardbarka krimseriane The Killing og nyss tilrådde Seven Seconds, står ei kvinne. Når det er sagt, kvinnene i desse seriane er over gjennomsnittet samansette og med eigen vilje, så at kanadiske Veena Sud står som serieskapar og produsent, forklarar kanskje kvifor. Om 90 prosent av alle produksjonar vert laga av menn, er det ikkje så rart om tonen vert bra maskulin. Ja takk til begge delar!

B.A.

Sjå på nett no

(Netflix) Det skal seiast at eg berre har sett to episodar av Seven Seconds, men det er verdt å sjå av så mange grunnar: særs gode rollefigurar fulle av lyte, kløkt og hjartevarme, side om side. Og så er eg svak for ein god dose korrupsjon i politiet, som forhåpentleg skal avslørast. Men det er noko uføreseieleg over den trass alt tradisjonelle mordhistoria som vert rulla opp, noko som gjer at eg både kosar meg i spenning og frydar meg over persongalleriet.

B.A.

Tre på topp

Bruce Willis er aktuell med tvilsame Death Wish. Her er dei største bidraga hans til dei formative åra mine.

1) Pulp Fiction, Quentin Tarantino 1994. Alle i min generasjon kan ramse opp replikkar frå denne mastodonten i populærkulturen.

2) Die Hard II, Renny Harlin 1990. Eg trur eg såg denne før den første. Eg trur ikkje det er lov å like han best. Eg tvilar på at han toler gjensyn. Eg veit at Willis var beintøff i båe.

3) 12 Monkeys, Terry Gilliam 1995. Tenk at han eine frå Monty Python laga film med Bruce Willis! Den sprø og fasinerande sciencefictionfilmen kravde tankekraft og var kul.

H.T.