Filmfjes

Bergen Internasjonale Filmfestival (BIFF) opna onsdag og skal i ei veke framover presentere over 150 dokumentar- og spelefilmar. Festivalen har som alltid ei mengd gjestar, som dansk-svensk-iranaren Milad Alami, som kjem til byen med filmen Sjarmøren, om ein mann på desperat jakt etter ei kvinne for å få statsborgarskap. Filmen har hausta fleire prisar og gått sin sigersgang på internasjonale filmfestivalar.

S.Å.

Sjå på nett no

(Netflix) I denne strålande BBC-serien, lagd til det rurale Yorkshire i Nord-England, følgjer vi etterforskaren Catherine Cawood og dei personlege og profesjonelle strabasane hennar. Ei kidnapping blir sett i verk av ein snurt arbeidar som er rasande over at sjefen ikkje gir han lønsauke. Samtidig slepp ein valdtektsdømd mann ut av fengselet. Catherines avdøde dotter fekk barn med mannen, eit barn Catherine oppsedar. Snart vert alt vove saman i ein trykkokar av ein thriller som snor seg unna klisjéfeller, og som er brutalt realistisk.

S.Å.

Tre på topp

I høve Battle, her er tre dansefilmar, i eit vidt sjangerspenn:

1. All That Jazz (1979). Bob Fosse var ein amerikansk koreograf og filmskapar, to felt han sameinte på briljant vis i dette halvbiografiske musikaldramaet om ein kvinneelskande, narkotikaavhengig koreograf-regissør.

2. Pina (2011). Wim Wenders’ vakre hyllest til den tyske koreografen Pina Bausch, kjend for sitatet: «Dans, dans, elles er vi fortapte.»

3. Black Swan (2010). Oh the horror, the horror. Svanesjøen, i Darren Aronofskys versjon, har aldri vore eklare.

S.Å.