Filmfjes

Brått har førti år gått sidan Jaimie Lee Curtis debuterte med eit skrik i Halloween i det herrens år 1978. For å slå ei mengd myntar på jubileet kjem endå ein film med same namn no før helgemessa. Heldigvis er Curtis klar til dyst igjen. Den i USAs tradisjon uendeleg lange traileren fortel for mykje, men det positive er at den steintøffe, hemnlystne kvinna verkar vere i form. Kritikarane i heimlandet meiner filmen er betre enn dei andre ni i rekkja sidan 1978.

H.T.

Sjå på nett no

(SF Anytime) På SF Anytime kan du sjå Jamie Lee Curtis ta verda med storm i si første rolle i den originale Halloween. Vil du ha ei nyare oppvarming til helgemessa, kan du sjå Coco på same teneste. Årets store animasjonssuksess er frå USA, men dykkar godt ned i dei meksikanske tradisjonane knytte til dei daudes dag. Med visuell teft og kunnskap om kultur er den sjarmerande filmen ein real brubyggjar mellom to nordamerikanske land, og mellom verdene til dei levande og dei daude.

H.T.

Tre på topp

Filmar der handlinga er lagd til afrikanske land, er det langt mellom. Her er tre høgst sjåverdige:

The Last King of Scotland (2006) Skummel film om Ugandas diktator Idi Amin og kor galne maktgalne menn kan bli.

Out of Africa (1985) Dønn kolonialistisk og ikkje akkurat nyansert bilete av Kenya, men fyrst og fremst ein fin film om Karen Blixen.

Timbuktu (2014) Spennande og ubehageleg om Jihad og islamske mørkemenn i eit elles fredfullt Mali.

B.A.