Filmfjes

Chile vann Oscar for beste framandspråklege film for første gong på søndag med En fantastisk kvinne av Sebastián Lelio. Sidan fjeset til Lelio alt har pryda dette hjørnet, trykker vi andletet til ein kunstnar frå nabolandet Argentina, Lola Arias. Ho minska kanskje vår nabo Sveriges sjansar då ho truga Ruben Östlund med rettssak for bruken av namnet hennar i nominerte The Square. Arias høyrer uansett heime på filmsida. Ho vann nyss to prisar i Forum-programmet på Berlinalen for filmen Theatre of War.

H.T.

Sjå på nett no

(NRK) I asmband med at Eliteserien brakar laus, har NRK sleppt serien Heime-bane. Der spelar Ane Dahl Torp ein trøndersk (!) fotballtrenar som tar over ein nyopprykka eliteserieklubb i Ulsteinvik. Ho leverer strålande skodespel og er kanonkul. Enda godt det rabla for ho då nokon freista slipe kantane til den ambisiøse figuren. John Carew spelar òg bra. Eg lever meg skikkeleg inn i serien og kjenner at eg nesten gler meg til angsten når Brann skal spele borte mot Ranheim.

H.T.

Tre på topp

Frå 7. til 13. mars burde alle vore i Oslo og gått på HUMAN internasjonale dokumentarfilmfestival. Ein del kjenner eg frå andre festivalar, ein del skulle eg gjerne sett på stort lerret:

Thank You for the Rain (regi: Julia Dahr) Fascinerande møte med Kisilu, ein kenyansk småbonde som får eit kamera for å dokumentera klima-
endringane.

Letters (regi: Marte Vold Jéro Yun) Denne tilrådde eg etter TIFF i år, så sjå på dette som ei ekstra oppmoding!

The Venerable W. (regi: Barbet Schroeder) Den buddhistiske munken Wirathu i Myanmar er blant dei mange som står for haldningane som førte til muslimforfølgingane i landet.

B.A.