Filmfjes

Dette fjeset har snart tent like mykje på filmar som på bøker, og når namnet er J.K. Rowling, betyr det at me snakkar om den bestseljande barnebokforfattaren i nyare historie. Fabeldyr: Grindelwalds forbrytelser hadde nyss premiere og ser ut til å slå alle rekordar. Og det er planlagt tre filmar til i serien, som starta med Fabeldyr og hvor de er å finne (2016). Kven treng trolldomselevar med briller når verda er full av fabeldyr? Å ja, det var sant – det kjem også ein film om far til Harry Potter om eit par år.

B.A.

Sjå på nett no

(Netflix) Av og til når ein burde gått på Cinemateket, men heller vil sitta inne, sjå på TV og eta is frå boksen, slik dei gjer i amerikanske filmar, er gjerne modusen å sjå film av nemnde type. Flaks då at Netflix har den vesle indie-filmen Private Life (2018) i katalogen. Eit par i førtiåra brukar alt dei har av pengar og energi på IVF-klinikkar i håp om å formeira seg før den biologiske klokka sluttar å tikka. I motsetning til mange slike filmar kjennest denne meir realistisk. Samstundes er han både underhaldande og tankevekkande. Kjøp is!

B.A.

Tre på topp

Hugs å sjå Arvingene før han forsvinn! Her er tre gullkorn til frå Paraguay:

1) Hamaca paraguaya (paraguansk hengekøye), Paz Encina (2006). Spolerings­varsel: Ingenting skjer i denne filmen. Eit par sit ein heil dag i ei hengekøye og ventar på at sonen skal kome heim frå krigen mot Bolivia i 1935. Lov å sovne. Reint gull.

2) 7 Cajas (7 esker), Juan Carlos Maneglia og Tana Schembori (2012). Ein særs god thriller med herleg språkleg blanding mellom guarani og spansk.

3) Cuchillo de palo (trekniv), Renate Costa (2010). Denne dokumentarfilmen er eit intimt familieportrett som dykkar ned i overgrepa mot 108 homofile under diktaturet til Alfredo Stroessner.

H.T.