Filmfjes

Fernando Birri gjekk bort på tampen av 2017. El País omtalar argentinaren som faren til den nye latinamerikanske filmen. Inspirert av italiensk neorealisme laga han den kanoniske korte dokumentarfilmen Tire dié (Kast ein tiar) i 1960 og var med det ein tidleg representant for radikal film i regionen. Satiren Los inundados (Flaumoffera) fekk pris for beste debut i Venezia i 1962. I 1986 opna Birri saman med blant andre Gabriel García Márquez den no vidgjetne internasjonale filmskulen på Cuba. Eitt av dei fremste fjesa i latinamerikansk filmhistorie er borte.

H.T.

Sjå på nett no

(Viaplay) Som med så mange andre nasjonalromantiske norske filmar strøymer folk til kino for å sjå Den 12. mann om dagen. Eg tilrår å vitje Viaplay for å sjå førre film om same historie, Ni liv av Arne Skouen (1957). På same strøymeteneste finn ein òg Under sanden (2016) av Martin Zandvliet, eit eksempel på at danskane har kome lenger enn vår provinsielle heltedyrking. Noko å læra av.

H.T.

Tre på topp:

Det finst sjølvsagt fantastiske filmar om par som tek vegen fatt for å koma til ei høgare forståing.

Thelma & Louise (1991) Det skal mykje til for at nokon vippar Susan Sarandon og Geena Davis’ biltur av toppen av lista mi.

Og mora di også (2001) Meksikanske bilar, ungdomar og politikk gav eit særs vellukka resultat.

The Straight Story (1999) Utypisk David Lynch og veldig utypisk road movie, men så til dei grader vakker og rørande.

B.A.