Filmfjes

Fjeset til Diana Spatarescu er ikkje så kjent, men ho vann nyleg prisen for beste kvinnelege birolle på den gjæve Gopo-utdelinga i Romania for rolla i The Fixer av Adrian Sitaru. Vel unnt! At det var den einaste prisen filmen vann, seier sitt om rumensk film. Det er ikkje nett nyhende at rumensk film har vore i støyten i godt over ti år. Er du kjapp, kan du sjå den framifrå The Fixer på kino no.

H.T.

Sjå på nett no

(Netflix) Utan ein Castro i front lurar folk på om noko skjer på Cuba. Neppe. Invasjonen frå imperiet i nord har alt skjedd. Netflix har betalt for krimserien Fire årstider i Havanna med Felix Viscarret frå kolonimakta Spania som regissør. Serieskaparen er rett nok Leonardo Padura, den populære forfattaren av bøkene om etterforskar Mario Conde.

Alle typane som har prega kubansk film sidan Sovjetunionen rakna, spelar – med Jorge Perugorría i spissen. Produksjonen er solid og streit med seksualiserte kvinner. Valdsnivået når ikkje Narcos. Cuba er trass alt eit av dei tryggaste landa i Amerika.

H.T.

Tre på topp

På ein skikkeleg bakfull søndag no nyss fekk eg for meg å sjå ei røys med kommersielle amerikanske komediar eg likte som liten.

Jakten på Susan (1985) Det blonde åttitalet har aldri sett betre ut enn med Madonna og Rosanna Arquette i hovudrollene.

Uncle Buck (1989) John Candy, altså! Sjølv om han eigentleg oppfører seg som ein psyko her, så gjer han det på ein fantastisk koseleg og morosam måte.

Tvillinger (1988) Har ikkje heilt tolt tida, men jammen ler eg ikkje framleis av Arnold Schwarzenegger som syng «Yakety yak» på flyet.

B.A.