Filmfjes

Fjeset til Jafar Panahi mangla på den raude løparen i Cannes denne veka. Han konkurrerer i hovudkonkurransen med finfine 3 Faces. Regissøren har forbod mot å lage film i Iran, og han får heller ikkje forlate landet. Det hindrar han ikkje. Sidan første ulovlege film, This Is Not a Film i 2011, har han vore produktiv. Igjen spelar han ei sentral rolle som seg sjølv. 3 Faces er ein morosam og reflektert film med feministisk brodd.

H.T.

Sjå på nett no

(NRK) Palestina har stifta eit filminstitutt som er på plass i Cannes. Dei siste dagane har dei flagga på halv stong. Ein av palestinarane som er her, er Mohamed Jabaly, som etter mange rundar med norske styresmakter har fått bli i landet som tromsøværing. Hans opprivande og filmatisk knallsolide dokumentar Ambulansen følgjer den desperate situasjonen for ambulansesjåførar under angrepa på Gaza i 2014. Diverre kunne ikkje filmen vore meir relevant enn no.

H.T.

Tre på topp

Så kva er ein god Marvel-actionfilm? Har eg sett mange? Nei, eg har jo ikkje det. Men eg likte desse tre her godt, då. Altså basert på figurane, ikkje nødvendigvis Marvel Cinematic Universe. Nerdar.

Spiderman (2002) Synest Tobey Maguire gjorde ein førebiletleg figur på den tida ein ikkje trong anabole steroid for å sjå bra ut.

Iron Man (2008) Robert Downey jr. Altså, kom an, han er jo dritfestleg!

Black Panther (2018) Tenk, det går an å la svartaste Afrika vera base for kul action.

B.A.