Filmfjes

Fjeset til Jakob Oftebro er så kjent at han kunna ha arva kallenamnet til far sin, Nils Ole «Oftebrukt». Det er korkje ættetavla eller at andletet hans innfrir vanlege venleiksideal med glans, som har bygd den fleirspråklege karrieren hans. Han er god. Tilhengjarar uroar seg no over at han har fått andregradsforbrenning i andletet medan han spelte inn fjernsynsserien Hamilton i Sverige. Han hevdar sjølv at han hadde flaks. Vi ser fram til å sjå det blide oppsynet hans i fleire filmar.

H.T.

Sjå på nett no

(TV 2 Sumo) Gjekk du glipp av fortyllande, friske The Fits, som var månadens film på cinemateka for eit år sidan, finst han no på nett. Dramaet er ein djerv debut av Anna Rose Holmer frå USA. Historia krinsar rundt stillfarne Toni. Ho er elleve år og ein bra boksar, men ho kastar lange blikk mot eldre jenter i ei kul dansegruppe. Snart spreier ein mystisk sjukdom seg som gjev jentene anfall. Stortalentet Royalty Hightower, imponerande lyd og foto bidrar til ei uvanleg rik oppleving.

H.T.

Tre på topp

Om du vurderer å få barn, bør du ikkje sjå desse tre om du treng overtyding med positivt forteikn.

Rosemary’s Baby (1968) Om det krev ein landsby å oppdra eit barn, trengst det berre ein bygard for å øydelegga det.

Å gløyme eit barn (2017) Denne aldeles forferdelege dokumentaren tek for seg skrekk nummer éin: at ungen din døyr av varme i bilen medan du er vekke.

We Need to Talk about Kevin (2011) Bak kvar skytemassakre står fortvilte foreldre og lurar på kva som gjekk gale i oppveksten. Grøss.

B.A.