Filmfjes

Grunna knutar på tråden melder ikkje Dag og Tid premiereklare Phantom Thread av Paul Thomas Anderson denne veka. Vi gler oss til filmen om ein designar i London som på femtitalet er ein trollmann med tråden. Det er Mark Bridges òg. Ikkje overraskande vann han Oscar for beste kostymedesign for filmen, som med The Artist i 2012. Han var med rette nominert også i 2015 for Inherent Vice. Bonus i år kom i form av ei jetski frå Jimmy Kimmel som takk for kortaste takketale.

H.T.

Sjå på nett no

(primevideo.com) I protest mot at Netflix truar med å halda filmar tilbake frå Cannes, tilrår eg å sjå film på sidene til konkurrenten denne veka. Amazon Studios verkar forstå kva film er, og satsar på kinodistribusjon i tillegg til strøyming. Prime Video har ikkje stort utval i Noreg enno, men du kan sjå klassikaren Once Upon a Time in America av Sergio Leone. Gangsterfilmen med Robert de Niro og gjengen fekk ståande applaus i femten minutt på premieren i Cannes i 1984.

H.T.

Tre på topp

Over 124 filmar har Charlotte Rampling spelt i, fortel IMDb meg. Ho har ikkje nødvendigvis hatt hovudrolla i dei eg nemner her, men skitt, det er gode filmar, då.

A Hard Day’s Night (1964). Beatles og «Girl at disco» (Uncredited). Berre elskar du ikkje slike morofakta?

Aberdeen (2000). Utvilsamt den Hans Petter Moland-filmen eg likar best. Eg likar han til og med skikkeleg godt.

Stardust Memories (1980). Hadde Woody Allen berre klart å sjå kvaliteten i kvinnelege skodespelarar etter at dei bikka tretti.

B.A.