Filmfjes

Internasjonale medium melde i helga at den kinesiske superstjerna Fan Bingbing ikkje er å finne nokon stad. Rykta om at ho hadde skjult inntekt for å betala mindre skatt, har gått sidan mai. Fan er kjend internasjonalt for actionfilmar i seriar som X-Men og Iron Man. Ho blei sist sett på ein barneheim i Tibet, kunne CNN fortelje. Det er uvisst kva tid vi får sjå ho på kino igjen.

H.T.

Sjå på nett no

(Filmbib) Det svirrar rykte om at NRK skal legge ned eit tosifra tal stillingar i dokumentar- og samfunnsavdelinga og oppretta om lag like mange i sporten. Det luktar skandale. Ei trøyst finst i at nettenesta til biblioteka har kjøpt mykje god norsk dokumentarfilm. På Filmbib.no finn du flotte Brødre (2015) av Aslaug Holm, ei utsøkt øving i familiefilm som blir omtala som dokumentarfilmens Boyhood. Holm er betre enn som så og vann hovudprisen på verdas største dokumentarfilmfestival, Hot Docs i Toronto. Somme har altså framleis tru på norsk dokumentar.

H.T

Tre på topp

Den amerikanske prisen Emmy har vore delt ut til beste TV-serie sidan 1949 og vart denne veka tildelt ymse hotte seriar. Her er tre vinnarar som har tolt tida:

M*A*S*H (vann i 1974) Som eg elska å sjå på dette om ettermiddagane etter at eg kom heim frå gymnaset!

The Muppet Show (vann i 1978) Berre tenk på Mna-mna – dette er jo genial underhaldning!

Cheers (vann i 1983, 1984, 1989, 1991) Sam, Diane, Rebecca, Woody, Cliff, Norm – måtte det gå i reprise for alltid.

B.A.