Filmfjes

Lista over filmar melde inn til Oscar-akademiet som kandidatar til beste ikkje-engelskspråkleg film, er klar. 87 land har meldt inn sin favoritt. Eg finn filmar eg vil sjå, og godbitar eg har sett, som Hva vil folk si av Iram Haq. Ei gledeleg overrasking var at fjeset til Rungano Nyoni representerer Storbritannia. Ho er fødd i Zambia, men har gjort walisar av seg. Regidebuten I Am Not a Witch er ei spenstig visuell nyting om ekte heksejakt i dagens Zambia. Filmen blei vist på fleire filmfestivalar i Noreg, men ikkje på kino.

H.T.

Sjå på nett no

(VGTV) Gode nyhende frå Syria er sjeldan kost. Vil du sjå ein film med ein kime av håp, tilrår eg Radio Kobani på det varmaste. Filmskaparen Reber Dosky følgjer nokre kurdiske venninner som driv radiostasjon i Kobani aust i Syria etter at IS er jaga ut. Alt skal byggjast opp att. Dei unge kvinnene intervjuar stridande og dekkjer demokratiske institusjonar i startgropa. Filmen blei ekstra relevant av fredspristildelinga sist veke.

H.T.

Tre på topp

Foreldrerolla kan skildrast på godt og vondt – her er tre av sistnemnde:

Nil By Mouth (1997) Dyster sosialrealisme med engelsk aksent og ein superskummel Ray Winstone.

Capturing the Friedmans (2003) Guffen dokumentar om definisjonen på ein dysfunksjonell familie.

Once Were Warriors (1994) Ikkje berre stolte tradisjonar blant maoriane, som denne triste og sterke filmen viser.

B.A.